ഇപ്പോള്‍ നാം ചിങ്ങം ഒന്നാണ് വര്‍ഷാരംഭമായി ആഘോഷിക്കുന്നതെങ്കിലും നമ്മുടെ കാര്‍ഷിക സംസ്കാര പ്രകാരമുള്ള വര്‍ഷാരംഭം മേടം ഒന്ന് അഥവാ മേടവിഷു ആണ്. പഴയ ആചാരമനുസരിച്ച് അന്ന് അടുത്ത ഒരു വര്‍ഷത്തെ ഫലം അറിയാനായി നാളികേരം ഉരുട്ടുന്ന പതിവുണ്ടായിരുന്നു. വിഷു ദിവസം രാവിലെ ഗൃഹനാഥന്‍ പ്രഭാത കൃത്യങ്ങളും സ്നാനവും ദേവ ദര്‍ശനവും കഴിഞ്ഞു ഈ ക്രിയ ചെയ്യുന്നു. വീട്ടില്‍ ശുദ്ധിയായ ഒരു സ്ഥലം തളിച്ച് വൃത്തിയാക്കി, പൂക്കള്‍ കൊണ്ടു അലങ്കരിച്ചു ദീപം തെളിയിച്ച് കര്‍പ്പൂരം ഉഴിഞ്ഞു അന്തരീക്ഷ ശുദ്ധി വരുത്തി ആത്മാരാധന തുടങ്ങിയ കര്‍മ്മങ്ങള്‍ ചെയ്ത് തൊഴുത് സ്വസ്ഥനായി ഇരിക്കുന്നു.
ഇതിനു ശേഷം ഉരുണ്ട ഒരു നാളികേരം കൊണ്ടുവന്ന് പുണ്യാഹതാല്‍ ശുദ്ധി വരുത്തി പൂക്കള്‍ അര്‍പ്പിച്ച് അതിന്റെ മുഖത്ത് കര്‍പ്പൂരം ഉഴിഞ്ഞ് പൂമാല ചാര്‍ത്തി ആരാധിക്കുന്നു. ഇനി കിഴക്ക് അഭിമുഖമായി ഇരുന്ന് " ഈ വര്‍ഷത്തില്‍ ഈ തറവാടിനും അംഗങ്ങള്‍ക്കും ഉണ്ടാകുന്ന ഗുണ ദോഷ ഫലങ്ങളെ സ്പഷ്ടമാക്കേണമേ " എന്ന രീതിയില്‍ ഭക്തി പൂര്‍വ്വം പ്രാര്‍ത്ഥിച്ച് ആ നാളികേരത്തെ കിഴക്ക് ലക്‌ഷ്യം വച്ച് ഉരുട്ടുന്നു. ഉരുളല്‍ നില്‍ക്കുമ്പോള്‍ അതിന്റെ മുഖം ഇതു ദിക്കില്‍ വരുന്നുവെന്ന് നിരീക്ഷിക്കുന്നു. അതിന്‍ പ്രകാരം സംവത്സര ഫലത്തെ മനസ്സിലാക്കുന്നു.
മുഖം കിഴക്കായാല്‍ ആയുര്‍ബലവും കാര്യഗുണവും പശുലാഭവും ഐശ്വര്യവും ഫലം. അഗ്നികോണില്‍ കലഹം, ദേഹ ക്ഷതം , കൃഷി നഷ്ടം, പ്രാണഭയം ഇവ ഫലം. തെക്ക് ദിക്കില്‍ ജീവനാശം അഥവാ കഠിന രോഗം, നിരുര്‍തി കോണില്‍ വന്നാല്‍ രോഗം, ശത്രുഭയം, ബന്ധു നാശം, കൃഷി നഷ്ടം ഇവ ഫലം . പടിഞ്ഞാറേ ദിക്കില്‍ മുഖം വന്നാല്‍ രോഗപീഡ, ദ്രവ്യ ലാഭം, കൃഷിഗുനം, ധാന്യ സമൃദ്ധി ഇവ ഫലം. ധന ലാഭവും ഉണ്ടാകും. വായു കോണില്‍ വന്നാല്‍ മനോദുഃഖം , ഭാര്യയുമായി കലഹം, കള്ളന്മാരില്‍നിന്നു ഭയം, ദാരിദ്ര്യം. വടക്ക് ദിക്കില്‍ ആണെങ്കില്‍ മംഗള ദ്രവ്യം ലഭിക്കും. രാജാവിന്‍റെ പ്രീതി, കൃഷിഗുണം ഇവ ഫലം. ഈശാന കോണില്‍ കാര്യ നാശം, കൃഷി നഷ്ടം, നാല്‍ക്കാലികള്‍ക്കു നാശം, മൃത്യു ദുഃഖം ഇവ ഫലമാകുന്നു. മുഖം നേരെ മുകളിലേക്കോ അധോമുഖമായോ വന്നാല്‍ അശുഭം, കാര്യ വിഘ്നം, മൃത്യുഭയം ഇവ ഫലം. ഇപ്രകാരമാണ് ഫലം മനസ്സിലാക്കുന്നത്.
No comments:
Post a Comment